Бухоро вилоятининг 4-сектор ҳудудидаги Когон тумани “Сараён” маҳалла фуқаролар йиғинида яшовчи Нозимжон Полвонов илгари иш излаб чет элларга ҳам боришга мажбур бўлганди. Афсуски, қайтганидан кейин ҳам ҳа деганда иши юришмади.
Эътиборлиси, 4-сектор ишчи гуруҳининг таклифи ва кўмаги билан унинг иши юришиб кетди. Нозимжоннинг ўрдак ва ғозчиликка иштиёқи баланд бўлгани боис, у ўз бизнесини тезда йўлга қўйди.
Айни пайтда у ўзига ажратилган 700 метр узунликдаги коллекторда
300 бошдан ортиқ ўрдак ва ғоз кўпайтиришга эришди.
— Бу ишни бошлашимдан олдин тўғриси, кимга қандай мурожаат қилишни ҳам билмасдим, – дейди Нозимжон Полвонов. — Негаки, бундан бир неча йил илгари ҳам шу ишни бошламоқчи бўлгандим. Аммо коллекторда ҳатто балиқчилик учун ҳам рухсат берилмагани учун ушбу режам амалга ошмай қолганди. Менга 4-сектор ишчи гуруҳининг кўмаги ўз вақтида бўлди деб ўйлайман.
Ёш тадбиркорнинг етиштираётган маҳсулотларига қизиқувчилар ортиб бораётгани сабабли, унинг бошлаган ишидан умидлари катта. Шу боис, у ёнига икки нафар ишсиз қариндошини ҳам ишга жалб қилган. Улар йил охирига қадар ўрдак ва ғозларини 2000 тага етказмоқчи.
Эслатиб ўтамиз, Бухорода жорий йил бошидан 4-сектор ишчи гуруҳи томонидан мавжуд коллектор (зовур) ларда балиқчилик, ўрдак ва ғозчилик лойиҳаларини ташкил қилиш бўйича тизимли ишлар йўлга қўйилган эди.
Бундан кўзланган асосий мақсад — “Ёшлар дафтари” ҳамда “Аёллар дафтари”га киритилган ишсиз фуқароларга ҳар томонлама қулай даромад манбасини яратиб бериш эди.
Иккинчидан, ушбу лойиҳалар орқали аҳоли учун арзон ва сифатли балиқ ҳамда паррандачилик махсулотлари етиштирилишини янада кўпайтиришни йўлга қўйиш режалаштирилган.
Қайд этиб кетиш лозим, жорий йил бошида вилоят бўйича балиқчилик ҳамда ўрдак ва ғоз боқиш имконияти бўлган жами 765 км. масофадаги коллекторлардан Нозимжонга ўхшаган 120 нафар ишсиз фуқароларга 187,3 узунликдаги коллекторлар ажратиб берилган.
Айни пайтда ушбу йўналишда ўз бизнесини йўлга қўйган барча ишсиз ёшлар ҳам қилаётган ишидан оз бўлсада барака топишни бошлашди десак муболаға бўлмайди.
Манба: https://bukhara-news.uz/kogonlik-nozimzhon-polvonov-kollektorda-%D1%9Erdak-va-%D2%93oz-bo%D2%9Bib-%D2%B3am-daromad-topish-mumkinligini-isbotlayapti/
