Асаларичилик нозик, шу билан бирга ўзига хос гашти бор соҳалардан бири. Дастурхоннинг кўрки бўлган тоза, табиий бол олиш катта маҳорат, тажриба ва меҳр талаб этади. Юртимизда соҳага қаратилаётган кенг эътибор сабаб асаларичилик субъектлари йилдан-йилга кўпайиб бормоқда. Натижада бозорларимизда бу маҳсулот арзонлиги, тўкинлиги таъминланаётир.
Асаларичилик билан шуғулланаётганлар бу ишнинг қанчалик машаққатли эканлигини жуда яхши билади. Агар йил қурғоқ келса, ҳосилнинг чўғи камайиши табиий. Бундай ҳолатда мутахассис асалари оилаларини соф ва сифатли асал олиш мумкин бўлган манзилга жойлаштиради.
Қизилтепа тумани «Деҳқонобод» маҳалласида истиқомат қилувчи Эркин Шодиев соҳада йигирма уч йиллик тажрибага эга. Айни пайтда у 150 та асалари оиласини меҳр билан парваришламоқда. Йилнинг қурғоқчилиги миришкорга ҳам бирмунча қийинчилик келтирди. У болари оилаларини дастлаб Ўртачўл ҳудудига, кейинчалик Самарқанд вилоятининг Нуробод тумани адирларига жойлаштирди. Май ойида эса улар Жиззах далаларига кўчирилди. Соҳанинг сир-асрорларини яхши билган Э. Шодиев табиат инжиқликларига қарамай, жорий йилнинг ўзида ҳар бир оиладан икки-уч марта, ўртача йигирма бир килограммдан табиий неъмат олишга муваффақ бўлди.
— Ўтган йили олти марта, ҳар бир оиладан 45-50 килограммдан асал олгандик, — дейди қаҳрамонимиз. — Бу йил оғир келди. Шундай бўлса-да, мўл ҳосил етиштиришга аҳд қилганмиз. Соҳанинг ўзига яраша нозик томонлари ҳам бор. Асаларичи буларнинг ҳеч бирини эътиборсиз қолдирмаслиги керак. Баҳорда болариларнинг касалликка чалиниши кўп кузатилади. Шунинг учун уларни вақтида эмлаш, қўшимча озуқа бериб бориш керак. «Олтин шурка» қуши арининг кушандаси. Асалари ундан ҳайиқиб, уясидан чиқмай туради. Бу қушдан ҳимоя қилиш мақсадида уларни бошқа жойга кўчиришимизга тўғри келади.
Шифокорларнинг таъкидлашича, асал инсон учун нафақат табиий тўйимли озуқа, балки кўплаб касалликларни даволашда қўлланиладиган ғоят шифобахш неъматдир. У иммунитетни ошириб, ошқозон-ичак касалликларининг олдини олади. Шунингдек, биологик фаол моддаларга жуда бой бу маҳсулот қон босимини меъёрлаштиради. Асалари муми, елими (прополис) ва сути ҳам шифобахш маҳсулот сифатида замонавий тиббиётда кенг қўлланилаётгани фикримизнинг яна бир тасдиғидир. Фармацевтикада дори-дармон сифатида ишлаб чиқарилаётган она ари сутида тўрт турдаги В, Е витамини, аминокислоталар мавжуд.
Бир сўз билан айтганда, асаларичиликнинг ривожланиб бораётгани халқимиз дастурхонининг тўйимли, шифобахш неъмат билан тўкин бўлишига замин яратаётир. Келажакда маҳсулотнинг экспортга чиқарилиши иқтисодий тараққиётга хизмат қилишига шубҳа йўқ.
Зулфия БОБОЕВА, «Дўстлик байроғи» газетаси мухбири.




















