Етти хазинанинг бири ҳисобланган асаларичилик сердаромад тармоқ ҳисобланади. Юртимизда ушбу соҳани ривожлантиришга катта эътибор қаратилаётганлиги сабабли табиий шифобахш неъмат билан бозорларимиз, аввало, халқимиз дастурхони тўлмоқда.
— Ўтган йил ички бозорга 1 минг 50 тонна сифатли маҳсулот етказилди, — дейди вилоят асаларичилар ассоциацияси раиси У. Муродов. — Айни пайтда 35 нафар аъзомиз керакли жиҳоз, ускуналар билан таъминланяпти. Уларга ўрмон ва экин ерлари ҳудудида болариларни парваришлаш учун имтиёз берилган. Биз давлат топшириғи асосида фермер хўжаликларининг ҳар бирига 5 тадан асалари оиласи тарқатиш жараёнини бошлаб юбордик.
Уюшма ўз сафларига шу касб соҳибларини бирлаштириш, соҳа ходимларининг керакли ахборотга эга бўлишига кўмаклашиш, асбоб-анжомлар, четдан келтирилган зотдор она асаларилар билан таъминлаш каби масалаларни ҳал этади, амалий семинарлар ўтказади.
Ўтган йили ассоциация аъзоларидан бир гуруҳи касб маҳоратини ошириш мақсадида Туркияга бориб келди. Жорий йилда эса, Исроил давлатига сафар уюштириб, ўзаро тажриба алмашиш режалаштирилган.
Бугунги кунда асалдан нафақат озиқ-овқат саноатида, балки соғлиқни сақлаш тизими, жумладан, халқ табобатида ҳам кенг фойдаланилмоқда. Унинг гулчанги, мўмиёси, сути билан беморларни даволаш йўлга қўйилган. Шифокорлар ва табобат аҳли тавсиясига кўра, боларидан олинган иккинчи маҳсулот турлари айни шу мақсадга йўналтириляпти.
— Мамлакатимизда фармакология фани борган сайин ривожланмоқда, — дейди Навоий тиббиёт коллежи ўқитувчиси З. Шодиева. — Айниқса, янгидан-янги синтетик доривор препаратларнинг яратилиши, уларнинг қўлланилиши яхши натижа бермоқда. Бироқ сунъий дори воситалари кўп ишлатилаётганлиги боис уларнинг ножўя таъсири ҳам намоён бўляпти. Шу сабабдан саломатликни мустаҳкамлаш, чарчоқни ёзиш ва куч-қувватни ҳамда иш қобилиятини ошириш учун табиий дориворларни қўллаш бирмунча мақсадга мувофикдир.
Қизилтепа туманида ҳам асаларичиликка ихлоси баланд инсонлар кўпчиликни ташкил этади. «Баланд Fардиён» маҳалласида яшовчи Нусратилла Сирожев дастлаб 5 қути ари билан иш бошлаган эди. Ҳозир 120 қути болари парваришламоқда. Ўтган йили улар етиштирган 2 тоннадан ортиқ асалнинг 200 килограммини кам таъминланган хонадонларга тарқатгани барчага ибрат бўлди.
Айни пайтда туманнинг чўлу яйловларида ғардиёнлик асаларичилар томонидан қарийб 600 қути болари оиласи парваришланмоқда.
С. ЭГАМОВ, фахрий педагог.
«Дўстлик байроғи» газетаси




















